Calape-Bohol

Higanting pasundayag sa nagkalain-laing sayaw sa kalibutan nga ginganlan og Paukyab sa Calape 2008 maoy mapaabot nga makita sa mga dumodo-ong ug taga Calape karong pista ni Sr. San Vicente Ferrer sa Mayo 8, 2008 diha sa Calape Cultural and Sports Center.

Kini maoy gibutyag ni Mayor Sulpicio N. Yu, Jr., M.D., kinsa maoy nagpatukod sa Calapsora Ambassadors, usa ka pundok sa mga mananayaw o dance troupe nga iyaha sa lungsod sa Calape.

Matod sa Mayor ang pulong Calapsora, kombinasyon sa pulong Calape ug Sora o sayaw ug gilangkoban kini og mga batan-on nga gipili human sa gihimong pagsulay o try out sa mga representante gikan sa 33 ka barangay sa Calape.

Sumala sa Mayor, ang gitudlong choreographer mao si Mrs. Henedina Ytac Sendrijas, gradwado ug kanhe membro sa Dance Troupe sa Southwestern University.

Si Mrs. Sendrijas gitabangan usab sa iyang anak, si Niño Winston Wingoal Y. Sendrijas, kinsa choreographer karon sa Diwanag Dance Troupe sa Holy Name University sa Tagbilaran City.

Ang pasundayag langkoban og tulo ka bahin, una- mga folk dances, ikaduha mga sayawng internasyonal ug ang ikatulo mga sayawng hip hop, moderno ug jazz nga maoy itudlo ni Wingoal.

Uban sa lumadnong sayaw mao ang Pasakat, Sayaw sa bangko ug Tinikling, ang muslim nga sayaw mao ang Tsaduratan, Nakaypay ug Singkil samtang ang internasyonal nga sayaw mao ang mga Polynesian, Spanish gypsy ug Tahitian.

Aron lig-on ang suporta, gihugpong ni Mayor Yu pinaagi sa usa ka Executive Order ang Culture and Arts Council of Calape, Bohol, Philippines.

Uban ni Mayor Yu isip Chairman mao sila si Mrs. Soledad Dumadag, Vice Chairman; mga membro sila si Kag. Jose A. Jumangit Jr., SB Chairman sa Komitiba sa Edukasyon ug Kultura; Mrs. Editha O. Damalerio, DepEd Supervisor; Unang Ginang Grace Esperanza Yu, Presidente sa Federated Womens Association; Kag. Cohleen Rose Guantero, SK Federated President; G. Alvaro Gujol, Tourism Action officer; Mrs. Henedina Ytac Sendrijas, Calapsora Ambassadors Choreographer; Julie Hernandez, representante sa pribadong sektor ug Maria Uno Mata, Human Resources Officer.

Maoy tuyo ni Mayor Yu nga ang Calapsora mahisama sa ngalan o tatak sa Loboc Childrens Choir, sa Loboc, Pangkat Kawayan sa Alicia ug Rondalla sa Dimiao.