Usa ka gala presentation nga giulohan og Paukyab sa Calape nga gipasiugda sa Calapsora Ambassadors karong May 8,2008 maoy usa sa mga kalingawan nga ipasundayag matag gabii atol sa pagsaulog sa kapistahan ni Seņor San Vicente Ferrer karong Mayo 10,2008.
Si Mayor Siulpicio N. Yu, Jr., nagkanayon nga ang maong kalihokan usa ka dance extravaganza nga magalangkob sa folk dances, international dances ug modern hip hop ug jazz.
Ang Calapsora ambassadors adunay 48 ka mga batan-ong estudyante ug mga out of school youths sa Calape kinsa napili gikan sa gatosan ka mga batan-ong nga misulay niadtong Enero ning tuiga.
Si Dr. Yu nagkanayon nga ang pulong Calapsora kombinasyon sa mga pulong Calape ug Sora, nga nagkahulogan og sayaw.
Anaa na karon sa ilang kahanas, ang Calapsora ambassadors mopasundayag sa tradisyon sa Calape, arts and culture matod pa sa choreographer sa grupo, Mrs. Henedina Y. Sendrijas.
Nagkanayon usab ang mayor nga mao kini ang unang higayon nga ang lungsod sa Calape nagmugna og dance troupe nga magsilbing ambassador sa lungsod.
Ang mga folk dances nga ipai-ila ni Mrs. Sendrijas mao ang Maglalatik, Pasakat ug Pinggan Pinggan Pino, samtang sa international dances mao ang Hawaiian, Spanish ug westerns samtang sa ikatulong bahin mao ang modern jazz ug hip hop diin si Winston Wingoal Sendrijas, ang house choreographer sa Diwanag Dance Troupe, Holy Name University, sa dakbayan sa Tagbilaran maoy nagtudlo.
Tuyo sa LGU-Calape ang katukoran sa dance troupe sama sa Loboc Childrens Choir sa lungsod sa Loboc, ang Pangkat Kawayan sa Alicia ug ang Rondalla sa Dimiao.
